«Банктар аралык процессинг борборунда» ири өлчөмдөгү акчаны мыйзамсыз чыгарып алуу боюнча коррупциялык схема аныкталды
УКМК “Банктар аралык процессинг борбору” ЖАКта 57.8 млн сомдук финансылык мыйзам бузуу аныкталганын билдирди.
“Банктар аралык процессинг борбору” ЖАКта өзгөчө ири өлчөмдөгү акча каражаттарын мыйзамсыз чыгарып кетүү боюнча коррупциялык схема аныкталып, УКМК тарабынан ЖАК кызматкерлеринин кызмат абалынан кыянаттык менен пайдалануу фактысы боюнча өзгөчө оор кылмыш жасоо менен кылмыш иши козголду.
Акцияларынын 46.7% КРнын Улуттук банкына таандык жана мамлекеттин менчиги болуп саналган «Банктар аралык процессинг борбору» ЖАКтын жетекчилиги жеке кызыкчылыкты көздөө жана жеке баюу максатында жогорулатылган баалар боюнча товарларды жана кызмат көрсөтүүлөрдү сатып алуу аркылуу акча каражаттарын мыйзамсыз алуу схемасын уюштурган.
“Тактап айтканда, 2021-жылдын декабрь айында «МПЦ» ЖАК жетекчилиги имаратты 106 млн сомго сатуу боюнча келишим түзгөн. Ошол эле учурда бул имарат техникалык жана квалификациялык талаптарга ылайык, «МПЦ» ЖАКтын муктаждыктарына жооп берген эмес жана тийиштүү түрдө пайдаланууга жараксыз болгон.
Юстиция министрлигине караштуу Соттук-эксперттик кызматынын корутундусуна ылайык, жогоруда аталган мүлктүн базар баасы 48 млн 184 миң сом эле болгон”, – деп айтылат маалыматта.
Ошентип, ашыкча баалоонун жана мамлекетке келтирилген зыяндын суммасы 57 млн 815 миң сомду түздү.
УКМК 8-ноябрда кылмышка шектүү катары «МПЦ» ЖАКтын башкармалыгынын мурдагы төрагасы 1977-жылы туулган А.У.С. кармалып, убактылуу кармоочу жайына киргизилгенин, тергөө иштери жүрүп жатканын маалымдады.
