КРнын энергетика системасына күч келип, өлкөдө массалык түрдө электр жарыгын өчүрүү катталды
Кыргызстандын энергетика системасы катуу сууктан улам жүктү көтөрө албай, республика боюнча электр жарыгы үзгүлтүккө учурады. Учурда энергетика системасында абал турукташты. Бул тууралуу Улуттук энергохолдингдин басма сөз кызматы массалык өчүрүүлөргө комментарий берип жатып билдирди.
«Бүгүн республиканын энергетика системасында керектөөчүлөрдү электр энергиясы менен камсыздоодо электр жарыгы үзгүлтүккө учурады. Абанын температурасынын кескин төмөндөшүнө байланыштуу электр энергиясын керектөө бир кыйла өскөндүгү байкалды. Электр жабдууларындагы жүктүн жогорулашына байланыштуу, мүмкүн болгон авариядан жабдууларды сактап калуу максатында автоматтык өчүрүүлөр болду», – деп айтылат маалыматта.
Ошондой эле, Улуттук энергохолдинг жарандарды электр энергиясын этияттык менен колдонууга, энергияны көп талап кылган электр шаймандарын күйгүзбөөгө жана жылытуунун альтернативдүү түрлөрүнө өтүүгө чакырды.
