Ошто мобилдик тиркеме аркылуу жазылып келүүгө боло турган КТБ ачылды
Бүгүн, 10-ноябрда Ош шаарында жаңы форматтагы Калкты тейлөө борбору (КТБ) ачылды. Бул тууралуу “Инфоком” МИнин маалымат кызматы билдирди.
Борбордун жалпы аянты 1300 м2, ыңгайлуу кирүүчү жолдор жана 100 унаа үчүн токтотуучу жай каралган. Документтерди тариздөө жана кабыл алуу үчүн 35 «терезе», өзүнчө маалымат кызматы жана сүрөт аянтчасы, кенен күтүү залы, балдар ойноочу аянтчасы бар эне-бала бөлмөсү уюштурулган. Мындан тышкары, нотариустар жана банктык кассалар каралган. Мүмкүнчүлүгү чектелген адамдарды кабыл алуу үчүн биринчи кабатта өзүнчө кабинет уюштурулуп, анда документтерди ыкчам тариздөө кызматы да каралган.
“Жаңы КТБнун ачылышы менен жарандар өз сапарын пландаштырып, Борборго келүү үчүн эң ыңгайлуу убакытты ээлеп коюуга мүмкүнчүлүк алышты. Бул мүмкүнчүлүк Earlyone мобилдик тиркемеси аркылуу ишке ашырылды. Тиркемени Play Market жана App Store аркылуу жүктөп алса болот”, – деп айтылат маалыматта.
Заманбап КТБ Ош шаарынын Касымбеков көчөсү 8г/1 дареги боюнча жайгашкан. Бул борбор күнүнө 1000ден ашык адамды тейлей алат.
Белгилей кетсек, ири калкты тейлөө борборунун ачылышы менен Ленина 318 жана ул. Раззакова 2 даректеринде жайгашкан мурдагы эки калкты тейлөө борбору – жабылды.
