Евробиримдик КРда таза суу жана таштандыларды башкаруу боюнча долбоорлорго 205 млн евро бөлөт
Евробиримдик бөлгөн 100 млн евродон ашык каражат суу менен камсыздоону реконструкциялоого, катуу тиричилик таштандыларын чыгарууга жана Кыргызстандын энергетика тармагын колдоого 205 млн евро тартууга мүмкүндүк берди. Бул тууралуу бүгүн, 17-ноябрда Евробиримдиктин КРдагы өкүлчүлүгүнүн басма сөз кызматы билдирди.
Белгиленгендей, өлкө боюнча жалпысынан 14 шаар жана 8 айыл аталган каржылык колдоодон пайдаланды.
Ош, Ноокат, Өзгөн шаарларында, ошондой эле Мырза-Аке, Куршаб жана Дөң-Булак айылдарына Евробиримдик 16 млн евродон ашык каражат бөлүп, анын негизинде суу менен камсыздоону калыбына келтирүүгө 32 млн евродон ашык инвестиция тартылды.
Европа Биримдиги Ошто таштандыларды чогултуу системасын модернизациялоого (5 млн евро) жана көмүртектин эмиссиясын азайтуу аркылуу энергиянын натыйжалуулугун жана туруктуулугун жогорулатууга салым кошту.
Бул колдоонун аркасында 376 миңден ашык адам таза ичүүчү сууга, энергияга жана катуу таштандыларды башкаруу боюнча жакшыртылган кызматтарды пайдалана алышат. ЕБ бул колдоону Европа реконструкциялоо жана өнүктүрүү банкы (ЕРӨБ) аркылуу көрсөтөт.
