Быйыл төлөм карталары күтүлгөндөн эки эсе көп чыккан - 4.6 млн
2022-жылы 2.4 млн төлөм картасын чыгаруу пландаштырылган, бирок сентябрдын аягында алардын саны 4.6 млн картага жеткен. Бул тууралуу Улуттук банк сунуштаган 2023-2027-жылдарга карата төлөм системасын өнүктүрүү стратегиясында айтылат.
Мындан тышкары, Улуттук банк кыргызстандыктар карталар аркылуу 33.2 миллионго жакын операция жүргүзөт деп күткөн. Бирок транзакциялардын көлөмү 88.7 миллиондон ашып, ал эми төлөмдөр 183.3 млрд сомдун ордуна 354 млрд сомдон ашкан.
Ошондой эле, электрондук капчыктардын саны боюнча божомолдор да туура эмес болуп чыккан. 2.3 млн гана күтүлгөнүнө карабастан, алардын жалпы саны 5.4 миллиондон ашкан. Электрондук капчыктар аркылуу операциялардын көлөмү болсо 70 млрд сомдон ашкан (14.1 млрд сомдук которуу күтүлгөн).
