Баткенде кыргыз менен тажик бийлигинин өкүлдөрү жолугушту
Кечээ, 26-декабрда Баткен облусунун Лейлек районунун Борбордук айылында КР УКМКнын Чек ара кызматынын төрагасынын биринчи орун басары – директору генерал-майор Уларбек Шаршеевдин Тажикстан Республикасынын УКМКсынын төрагасынын биринчи орун басары – Чек ара аскерлеринин командачысы генерал-полковник Раджабали Рахмоналинин жумушчу жолугушуусу болуп өттү.
КР УКМКнын Чек ара кызматынын берген маалыматына ылайык, жолугушуунун жүрүшүндө чек ара ведомстволорунун жетекчилери КР менен ТРнын чек ара аймактарындагы абалды турукташтыруу боюнча мурда кол коюлган протоколдордун аткарылышын карашкан.
Мындан тышкары, кыргыз-тажик чек арасындагы түзүлгөн кырдаалды талкуулап, эки тараптуу чек ара кызматташтыгын өнүктүрүү багыттарын белгилешкен.
Тараптар кыргыз-тажик чек арасында коопсуздукту жана ишенимди бекемдөө, бейпилдик менен стабилдүүлүктү сактоо Борбордук Азия чөлкөмүндө тынчтыкты жана стабилдүүлүктү сактоого кошкон маанилүү салым экенин бир добуштан билдиришкен.
Сүйлөшүүлөрдүн жыйынтыгы боюнча төмөнкү чечимдер кабыл алынган:
- 2023-жылы биргелешкен жумушчу комиссиянын ишин улантуу
- Тараптардын прокуратураларынын алдында Тараптар эки республикада турган жарандардын мүлкүн кайтарып берүү боюнча ишти тездетүү жөнүндө маселени козгоо
- Мамлекеттик чек арада Тараптардын ортосундагы мамилелердин курчушуна алып келген аракеттерге жол бербөө.
Сүйлөшүүлөргө КР Президентинин Баткен облусундагы ыйгарым укуктуу өкүлү Абдикарим Алимбаев жана Тажикстандын Согди облусунун төрагасы Раджаббой Ахмадзода да катышты.
