«Манас» аэропортуна инвестиция салууга 9 компания кызыкдар
“Манас” аэропортуна инвестиция салууга жети өлкөнүн компаниялары кызыкдар экенин билдирди. Бул тууралуу Жогорку Кеңештин Бюджет, экономикалык жана фискалдык саясат боюнча комитетинин 26-декабрдагы жыйынында Улуттук инвестиция агенттигинин директорунун орун басары Нурадил Баясов билдирди.
Анын айтымында, 2022-жылдын жай айларында алар эл аралык инвесторлор катышкан конференция өткөрүшкөн жана ага төмөндөгү өлкөлөрдөн компаниялар катышкан:
- Corporacion America Airports (Аргентина)
- Munich Airports (Германия)
- Incheon International Airports (Түштүк Корея)
- Korea International Corporation (Түштүк Корея)
- EGIS (Франция)
- YDA Group (Түркия)
- IC ICTAS (Түркия);
- Airports of Regions (Россия)
- GMR Group (Индия).
Жыйында IFC өкүлү Эркин Асрандиев техника-экономикалык негиздемени иштеп чыгуу иштери аяктаганын билдирип, ал министрлер кабинетине жөнөтүлгөнүн айтты.
«Аэропорт потенциалдуу инвесторго 28 жылга берилет деп болжолдонууда. Бул убакыттын ичинде аэропорттон жүргүнчүлөрдү ташуу 4.5-5 эсе көбөйөт. 400 млн доллар инвестиция салынып, каражат жыл сайын төлөнөт. «Манас» аэропорту пайдаланып жаткан ар бир жүргүнчүдөн 15 доллар кыргыз тарапта калат», – деди Асрандиев.
