China Southern Airlines авиакомпаниясы Бишкек - Сиань туруктуу аба каттамын ачат
Бишкектен Сианьга туруктуу авиакаттамдын ачылышы күтүлүүдө. Бул тууралуу «Манас» эл аралык аэропортунун» (Кыргызстандагы бардык аэропорттордун оператору, мамлекеттик үлүшү 79%) маалымат кызматы билдирди.
«МЭА» ААКтын берген маалыматына караганда, Кытайдын China Southern Airlines авиакомпаниясы келерки айда Сиань – Бишкек – Сиань багыты боюнча түз каттамдарды ачууну пландап жатат.
«Манас» эл аралык аэропортунан Кытайдын эң ири шаарларынын бирине туруктуу учуулар биринчи жолу аткарылмакчы. Жаңы багыт боюнча каттамдар 11-февралдан баштап, ар жекшемби сайын аткарылары күтүлүүдө.
