Аз камсыз болгон үй-бүлөлөргө күн батареялары акысыз берилет - «Нур Кубат» пилоттук долбоору ишке кирет
Эмгек министрлиги, Энергетика министрлиги менен биргеликте “Нур Кубат” долбоорун ишке ашырууга ниеттенүүдө. Бул тууралуу Эмгек, социалдык камсыздоо жана миграция министри Кудайберген Базарбаев Энергетика министрлигинин өкүлдөрү жана кызыкдар тараптар менен жолугушууда билдирди.
Жакыр үй-бүлөлөргө колдоо көрсөтүүнү күчөтүү максатында аталган министрлик 2023-жылы Энергетика министрлиги менен бирдикте “Нур Кубат” долбоорун пилоттук режимде ишке ашырууну пландап жатат.
“Нур Кубат” долбоорунун алкагында “Үй бүлөгө көмөк” жөлөкпулун алган Чүй облусунун Чүй жана Жайыл райондорунда жашаган үй-бүлөлөргө кубаттуулугу 5-10 кВт/ч күн батареялары акысыз берилет. Ошол эле учурда, күн батареялары иштеп чыккан бардык электр энергиясы жөлөкпул алуучулар тарабынан колдонулат, ал эми ашыкчасы мамлекет тарабынан сатылып алынат”, – деди министр.
Пилоттук долбоор ийгиликтүү ишке ашырылса, Эмгек министрлиги, Энергетика министрлиги менен биргеликте “Нур Кубат” долбоорун республика боюнча аз камсыз болгон үй-бүлөлөргө жайылтуу ниетинде.
Азыркы учурда жалпы “Үй бүлөгө көмөк” жөлөкпул алуучулардын саны республика боюнча 106.7 миң үй-бүлөнү түзөт.
