Эгерде ишкер кээ бир мыйзамдарды билбей калса, мамлекеттик органдар биринчи консультация бериш керек - бизнес-акыйкатчы
Кыргызстандын бизнес-акыйкатчысынын милдетин аткаруучу Нурлан Мүсүралиев “Биринчи радиого” бизнес менен мамлекеттик текшерүү органдарынын ортосундагы кызматташуу тууралуу пикирлерин билдирди.
Анын айтымында, Экономика министрлигинин алдында кандайдыр бир жумушчу топ түзүлүшү керек жана ага эксперттер, мамлекеттик органдардын, бизнес ассоциациясынын өкүлдөрүн киргизиш керек.
“ЖМКларда айрым мамлекеттик органдар “мынча ишкер текшерилип, баланча айып пул салынды” деп өздөрүнүн отчетторун берип жатышат. Бул туура эмес.
Биринчиден, текшерүү органдары менен бизнестин ортосунда өнөктөштүк болуш керек. Мисалы, ишкер кандайдыр бир мыйзам базасын, укуктарын же милдеттенмелерин билбей калса, сөзсүз мамлекеттик текшерүү органдары консультация берип, иш алпарыш керек. Ишкер кайсы жагынан туура эмес кылып жатат, түшүндүрүү зарыл. Эгерде ишкер ошондон кийин дагы мыйзамдарды бузса, анда айып пул салыш керек. Бирок биринчи консультация берилиш керек”, – деди Мүсүралиев.
Белгилей кетсек, радионун берүүсүндө 2023-жылдын 1-январынан тарта ишкерлерди текшерүүгө киргизилген мораторий жөнүндө талкуу болду. Ал жарлыктын алкагында өкмөттүн токтому чыгат жана ал жакынкы күндөрү расмий жарыяланары күтүлүүдө. Ага ылайык, ишкерлер мамлекеттик текшерүүдөн бошотулмакчы.
