МЖӨ борбору менен биргеликте «Ош» аэропортунда карго терминал куруу каралууда
Жарандык авиация мамлекеттик агенттигинин Аэродромдогу учуулардын коопсуздугун жөнгө салуу бөлүмүнүн башкы инспектору Бекзат Алимов “Биринчи радиого” Ош аэропортун жакынкы эки жылда ремонттон өткөрүү маселеси каралып жатканын билдирди.
Анын айтымында, аталган аэропортту оңдоп-түзөө иштери Мамлекеттик жеке өнөктөштүк (МЖӨ) борбору менен бирге аткарылмакчы.
“Ош” аэропортун өнүктүрүү максатында МЖӨ менен чогуу жаңы учуп-конуу тилкесин куруу, эки тараптан жарыктандыруу, карго терминалын куруу, аэровокзалды кеңейтүү каралууда”, – деди ал.
Ошондой эле кыргыз авиациясынын кыскача тарыхына да токтолду.
“Кыргызстандагы аэропорттордун тарыхы тууралуу айта турган болсок, биринчи жолу 1927-жолу биринчи учак келип конгон. Ал кезде так бир аэропорт же аэродром болгон эмес. 1933-жылы биринчи биздин учактар учуп чыккан. Ошентип кыргыз авиациясынын тарыхы башталган. Азыркы учурда бизде катталган 12 аэропорт бар. Алардын ичинен он бири иштеп жатат. Анын ичинен Талас аэропорту учактарды кабыл ала албайт”, – дейт Алимов.
