Кыргызстанда патенттин 22 түрү кыскартылды - февраль айынан баштап 34 түрү калат
Министрлер кабинети патенттин 22 түрүн кыскартып, 34үн гана калтырды. Аталган токтом 2022-жылдын декабрында кабыл алынган.
Кабыл алынган өзгөртүүлөр февраль айынан тарта күчүнө кирет. Өзгөртүүлөрдүн ичинде аянты 30 чарчы метр болгон соода түйүндөрү бирдиктүү салык ставкаларына өтөөрүн белгилеп кетүүгө болот. Маселен, дүкөндөрдөн тышкаркы чекене соода жайларынын салыктык чени айына 5 миң сомго чейин жогорулаган.
Турак-жайларды ижарага берген менчик ээлери үчүн адилеттүү тариф кабыл алынган. Мурда батирди ижарага бергенде бир бөлмөгө 1.5 миң сом төлөш керек болсо, азыр турак жай аянты үчүн 30 сомдон 50 сомго чейин эсептөө жүргүзүлөт.
Белгилей кетсек, ишкерлер өз ишмердүүлүгүндө ККMди колдонууга милдеттүү. Бирок 1-апрелге чейин аянты 10 чарчы метр болгон соода түйүндөрү аны колдонуудан бошотулду. Ал эми таксисттер менен курьерлер жылдын аягына чейин ККМди колдонуудан бошотулду.
