Дыйкандар айына сегиз сомдон гана төлөм төлөшөт, бирок пенсияга кеткен чыгым 40%ды түзөт - минкаб
Минкабдын төрагасы Акылбек Жапаров Социалдык фондду өнүктүрүү жана калкты пенсиялык камсыздандыруу менен камтууну кеңейтүү маселеси боюнча кеңешме өткөрүп, анда пенсияга байланыштуу бир катар маселелерди көтөрдү.
2023-жылдын башында пенсионерлердин саны 740 миңге жакын саналат, жыл сайын алардын саны 40-50 миң адамга көбөйөт.
«Мамлекет бардык жарандарыбызды татыктуу карылык менен камсыз кылууга милдеттүү. Бул биздин конституциялык милдетибиз. Бирок, мисалы, дыйкан чарба мүчөлөрү белгиленген ставкалар боюнча айына орто эсеп менен сегиз гана сомдон төлөм төлөп турган азыркы системанын шартында биз эч качан татыктуу карылыкты камсыз кылуу максатына жете албайбыз.
Айыл чарба кызматкерлеринин төгүмдөрүнүн үлүшү – 0.6%ды, ал эми алардын пенсиясына кеткен чыгымдар 40%ды түзөт. Жеке ишкерлер жана башка категориялар боюнча ушундай эле көрүнүш орун алган. Биз мамлекеттик эмес пенсиялык камсыздоонун жагымдуулугун жогорулатуу боюнча бир катар мыйзам долбоорлорун Жогорку Кеңешке киргизгенбиз. Ошондой эле бардык жарандарга милдеттүү жана ыктыярдуу пенсиялык программалардын так, түшүнүктүү жана натыйжалуу механизмдери жеткиликтүү болуусу үчүн кеңири маалыматтык программаны жүргүзүү зарыл», – деди Жапаров.
“Эгерде 2022-жылы ассигнация 29.4 млрд сомду түзсө, 2023-жылы Соцфондго бюджеттен түз которуулар 41.4 млрд сомду түздү. Ошону менен бирге, Социалдык фонддун калган басымдуу каражаттары бюджеттик уюмдардан камсыздандыруу төгүмдөр эсебинен да түзүлөт (2022-жылы – 23 млрд сом, 2023-жылы – 27.6 млрд сом)”, – деп айтылган минкабдын маалыматында бул өлкөдө пенсиялык камсыздандыруунун өнүкпөгөндүгүн көрсөтүп турганы белгиленет.
