«Кумтөр Голд Компани» камактагы Тенгиз Бөлтүрүктүн катына жооп берди
«Кумтөр Голд» ЖАКтын каражаттарын уурдоого шектелген Тенгиз Бөлтүрүктүн каты бизди таң калтырды. Мындай билдирүүнү компаниянын жетекчилиги билдирди.
“КГКнын” азыркы жетекчилиги Тенгиз Бөлтүрүк компанияны бир жылдан ашык жетектеп, өзүнүн долбоорлорун жана пландарын ишке ашыруу үчүн бардык шарттар менен камсыз болгон, жогорку айлыкка, гонорарга шектүү экспаттарды тартуудан башка эч кандай реалдуу кадамдар жасабаганын билдирди.
“Анын үстүнө, Кумтөр дагы эле анын кесепеттерин жоюуга аргасыз
болууда. Баса, бардык кызматтардагы “кымбат” чет элдиктерди ата мекендик адистерге ийгиликтүү алмаштырды. Жаңы жетекчилик компаниянын 2031-жылга чейин өнүктүрүү стратегиясын иштеп чыкты”, – деп айтылат билдирүүдө.
Геологиялык чалгындоо иштери толугу менен жүргүзүлүп жатканы да айтылат. Карьердин адистеринин маалыматы боюнча, 135 тоннадан ашык казып алууга боло турган алтын бар, дагы 112.6 тоннасы калдык сактоочу жайда.
“Бул көрсөткүчтөрдүн баарын Тенгиз Бөлтүрүк компаниянын жетекчиси катары жатка билиши керек. Албетте, Тенгиз Бөлтүрүк мындай орунсуз түрдө өзүн эстетип, өзүн алмаштыргыс кадр катары көрсөткүсү келүүдө.
«Кумтөр Голд Компани» ЖАК Тенгиз Бөлтүрүктү жеке максаттарына жетүү үчүн компаниянын атын колдонбоону сунуш кылат”, – деп айтылат маалыматта.
