Мэрия жерлерди сатып алуу үчүн коэффиценттерди киригизүүнү сунуштады
Бишкек шаарынын мэриясынын орун басары Азамат Кадыров 30-мартта Бишкек шаардык кенешинин туруктуу комиссиясынын жыйынында мурда убактылуу ижарага берилген жер тилкелерин сатып алуу тартибин өзгөртүү боюнча мыйзам долбоорун сунуштады.
Анын айтымында, документ жаңы Жер кодекси күчүнө киргени менен байланыштуу даярдалган. "Жер кодексине ылайык, жер тилкелерин сатып алуу боюнча нормалар буга чейин каралган. Жаңы тилкелер 10% баа менен берилет, ал сатып алуу катары эсептелет", — деди Кадыров.
Кадыров мыйзам алкагында жергиликтүү өз алдынча башкаруу органдарына мурда берилген тилкелерди сатып алуу методологиясын иштеп чыгуу тапшырылганын белгиледи. Долбоор куруучулар менен биргеликте даярдалган.
Сунушталган методикага ылайык, сатып алуу баасы 2000–2025-жылдардагы жерлердин базар бааларынын ачык булактардан алынган маалыматтарына таянуу менен эсептелет. Шаар 5 зонага бөлүнөт.
Сатып алууну стимулдаштыруу үчүн төмөндөтүү коэффициенттери каралган:
- 0,5 — учурдагы жылы сатып алганда;
- 0,7 — кийинки жылы;
- 0,8 — 2028-жылы;
- 1 — 2029-жылы;
- 1,2 — 2030-жылы.
Мындан тышкары, эсептөө базасы катары объектин пайдаланууга берилген датасы эмес, курулушка уруксат алынган дата кабыл алынат. Кадыров бул кадамдын себебин, батирлерди көбүнчө курулуштун эрте баскычында сатуу башталарын менен түшүндүрдү.
Жыйын учурунда JIA Ассоциациясынын төрайымы Гульнара Сатыбалдиева мурдагы жер сатып алуу механизми иштеп келгенин, бирок 10 жылдан ашуун убакытка токтотулганын билдирди.
Анын айтымында, жер тилкелеринин баасын баалоо аркылуу сатып алуу аракеттери натыйжа берген эмес. "Баалоочулар инфраструктура менен эскирген тилкелердин баасын эсептешчү, бул баанын ашыкча жогору болуусуна алып келчү", — деди ал.
Сатыбалдиева акыркы жылдары бир нече компания гана жер тилкелерин сатып алганын, ал эми жүздөгөн ижарачылар болсо буга катышпай калганын белгиледи. Ал ачык маалыматтарга таянуу жана төмөндөтүү коэффициенттерин колдонуу идеясына макул экенин билдирди, бирок алардын градациясын кайра карап чыгуу жана жер тилкелеринин көлөмүн эске алуу сунушун кошту.
Айрыкча, 1,2 гектардан чоң тилкелер үчүн кошумча коэффициентти карап чыгуу сунушталды. Жыйынтыгында методиканын долбоору кийинки кароого жөнөтүлдү.
