Өткөн жылы мигранттар Кыргызстанга 2.7 млрд доллар которушкан - 8.8%га көп
Өткөн жылы Кыргызстанга сырттан келген акчанын көлөмү 2.7 млрд долларды түзгөн. Бул тууралуу Улуттук банктын Төлөм системалары башкармалыгынын башчысы Айбек Султаналиев билдирди.
Улуттук банктын 2022-жылдын 11 айы үчүн статистикалык маалыматтарына ылайык, башка өлкөлөрдөн КРга акча которуулардын көлөмү 2 млрд 700 млн АКШ долларынан ашыкты түзүп, өткөн жылдын ушул мезгилине салыштырмалуу 8.8%га өскөн.
Көбүнчө Россия, АКШ жана Түркия сыяктуу үч өлкөдөн которуулар жүзөгө ашырылган. 2021-жылы болсо акча которуулардын көлөмү 2 млрд 750 млн доллардан ашыгыраакты түзгөн.
Бүгүнкү күндө Улуттук банкта банк эсебин ачпастан эл аралык акча которуу системаларынын 15 оператору каттоодон өткөн. Ошондой эле Visa, MasterCard, Union Pay Int., American Express, JCB, Золотая Корона жана Мир сыяктуу 7 банктык төлөм карттары менен эсептешүүлөрдүн эл аралык системалары да каттоодон өтүшкөн.
