Кыргызстанда февраль айынан тарта пияз менен сарымсакты экспорттоого тыюу салынат
Кыргызстандын Айыл чарба министрлиги пияз менен сарымсакты республиканын чегинен тышкары алып чыгууга тыюу салууну сунуштоодо. Экспортко убактылуу тыюу салуу боюнча тиркемедеги тиешелүү өзгөртүүлөр министрлер кабинетинин сайтында коомдук талкууга коюлду.
Кыргызстандан алып чыгууга тыюу салынган азыктардын тизмесине пияз, шалот, сарымсак сыяктуу жашылчаларды кошуу сунушталууда. Пиязды экспорттоого тыюу салуу чечими ал кабыл алынган күндөн тартып бир жумадан баштап күчүнө кирет жана 2023-жылдын 4-майына чейин созулат.
Долбоордун негиздемесине ылайык, пиязды экспорттоого тыюу салуу өлкөнүн азык-түлүк коопсуздугун камсыз кылуу жана пияздын базар баасын турукташтыруу максатында Монополияга каршы жөнгө салуу мамлекеттик кызматынын пияздын кымбатташы жөнүндө расмий ырастоосунан кийин, ошондой эле Пакистандагы табигый кырсыктардан улам Казакстан пияздын экспортуна чектөө киргизгенден кийин иштелип чыккан.
Эске салсак, 2023-жылдын 17-январында Казакстан үч айга пиязды экспорттоого тыюу салуу чечимин кабыл алган. Бул чара пиязды Казакстандан массалык түрдө экспорттоого жол бербөө жана ага болгон бааны турукташтыруу максатында көрүлгөн.
