Кореялык Interact компаниясынын адистери ӨКМдин өрт өчүрүүчүлөрүнө тренингдерди өтөт
Interact компаниясынын адистери ӨКМдин 10 инструкторуна жана 120 өрт өчүрүүчүгө атайын тренингдерди өткөрөт. Андан кийин инструкторлор башка өрт өчүрүүчүлөргө XR системасы аркылуу машыгууларды өткөрүшөт. Бул тууралуу Өзгөчө кырдаалдар министрлигинин маалымат кызматы билдирди.
Кореянын Эл аралык кызматташтык боюнча KOICA агенттиги КР Өзгөчө кырдаалдар министрлиги менен биргеликте “КР ӨКМдин өрт-куткаруу кызматтарынын дараметин арттыруу аркылуу калктын коопсуздугун камсыздоо” долбоорун ишке ашырууда.
Долбоордун жалпы баасы 7 млн долларды түзүп, өрт куткаруу бөлүктөрүн курууну жана керектүү техникаларды сатып алууну камтыйт.
Ошондой эле кечээ, 31-январында КР ӨКМдин Жарандык коргоо адистерин даярдоо жана кайра даярдоо борборунун «Өрт коопсуздугу» кафедрасында виртуалдуу реалдуулук системасы аркылуу окутуу-машыгуу классынын расмий ачылуу аземи болуп өттү. Ага KOICA агенттигинин директору Ли Жонгсу жана «Interact» компаниясынын башкы директору Квон Нам-Хёк катышты.
Долбоор Кореянын Interact компаниясы тарабынан ишке ашырылды. Окуу борбору заманбап техникалар менен жабдылып, өрт өчүрүүчүлөр инновациялык виртуалдык реалдуулук системасынын жардамы менен ар түрдүү кырдаалдарда өрт өчүрүү жөндөмдүүлүгүн арттыра алышат. Мындай долбоор Кыргызстанда алгачкы ирет ишке киргизилүүдө.
