Чаткалда кен иштетүү ишканасына 18.8 га жер аянты мыйзамсыз берилген – Башкы прокуратура
Чаткал районундагы «Каратюбе-Бузук» участогунан «Э» ЖЧКсына ашыкча 18.83 га жер аянты мыйзамсыз ижарага берилген. Бул тууралуу Башкы прокуратура маалымдады.
Маалыматка ылайык, «Чаткал» токой чарбасы мекемесинин кызматкерлери мыйзамдарды одоно бузуп, Чаткал районундагы «Каратюбе-Бузук» участогунан жер казынасын пайдалануу жөнүндөгү лицензиясында көрсөтүлгөн 24.07 га жер аянтынын ордуна, жалпы 42.9 га жер аянтына «Э» ЖЧКсы менен 2026-жылдын 15-июнуна чейин ижара келишимин түзүшүп, ашыкча 18.83 га жер аянтын мыйзамсыз ижарага берип жиберишкендиги аныкталган.
«Мындан сырткары, «Э» ЖЧКсы алтын кенин иштетүүдө КРнын «Жер казынасы жөнүндө» мыйзамынын талаптарын бузуу менен лицензиялык уруксат берилген аянттан тышкары 1.50 га жер тилкесине чыгып, мыйзамсыз алтын казуу иштерин жүргүзүп келген», - деп билдирүүдө белгиленген.
Аталган факты боюнча райондук прокуратурасы тарабынан Кылмыш-жаза кодексинин 337-беренеси («Кызмат абалын кыянаттык менен пайдалануу») жана 218-беренеси («Мыйзамсыз ишкердик же банктык иш») менен кылмыш иши козголуп, учурда тергөө иштери жүргүзүлүүдө.
