Дүйнөлүк банк экосистемаларды калыбына келтирүүгө колдоо көрсөтөт
Дүйнөлүк банктын каржылоосу менен “Жаратылыш ландшафттарын туруктуу калыбына келтирүү” долбоорун ишке ашыруу миссиясы уланууда. Өзгөчө кырдаалдар министрлигинин маалыматы боюнча, Жалал-Абад облусундагы долбоордук аймактарга жеринде таанышуу уюштурулуп, калкты табигый кырсыктардан коргоо максатында жүргүзүлө турган жээк бекемдөө жана селге каршы иштер талкууланды.
Сапардын жүрүшүндө техникалык-экономикалык негиздеме жана долбоордук-сметалык документация даярдоого байланыштуу техникалык маселелер талкууланып, адистер дамбалардын учурдагы абалын жана алдыңкы инженердик иштердин планын карап чыгышты.
Жалпысынан долбоордун алкагында сел жана суу ташкындарынын таасирине дуушар болгон 21 участокту реконструкциялоо пландалууда. Бул иш-чаралардын жыйынтыгында 4000ден ашуун үй-бүлө жана 5500 гектар айыл чарба жери сел жана суу ташкын коркунучтарынан корголмокчу.
