Э.Байсалов: Биз миллиондогон ачка адамдарга жардам берүүгө милдеттүүбүз
Министрлер Кабинетинин Төрагасынын орун басары Эдил Байсалов Доха шаарында (Катар мамлекети) өткөн социалдык өнүгүү боюнча Экинчи дүйнөлүк саммиттин алкагындагы жыйынга катышты.
Саммиттин жүрүшүндө сөз сүйлөп жатып Эдил Байсалов:
«Дүйнө жүзү боюнча жүз миллиондогон адамдар ачкачылыктан, жакырчылыктан жана жокчулуктан жапа чегүүдө. Биз алардын азап-кайгысын жеңилдетүү үчүн колдон келгендин баарын кылууга милдеттүүбүз»-деп билдирди. Ошондой эле Кыргызстан жакырчылыкты жоюу жана бардыгын азык-түлүк менен камсыз кылуу боюнча универсалдуу максаттарды бөлүшүп, ачкачылыкка жана жакырчылыкка каршы күрөшүү боюнча глобалдык альянска кошулганын белгиледи.
Маалымат үчүн: Ачкачылыкка жана жакырчылыкка каршы күрөшүү боюнча глобалдык альянс 2024-жылы Рио-де-Жанейродо өткөн G20 саммитинде БУУнун №1 "Жакырчылыкты жоюу" жана №2 "Ачкачылыкты жоюу" туруктуу өнүгүү максаттарын илгерилетүү үчүн түзүлгөн. Учурда анын курамына 104 мамлекет кирет.
