УКМК төрагасы К.Ташиев Жалал-Абад аэропортунун курулушун текшерди
Министрлер кабинетинин төрагасынын орун басары - УКМК төрагасы Камчыбек Ташиев кечээ Сузактагы "Жалал-Абад" эл аралык аэропортуна барып, курулуш иштерин жеринде текшергенин УКМКнын маалымат кызматы билдирди.
К.Ташиев учуп-конуу тилкесиндеги процесс менен таанышып, подрядчиктерге курулушту тездетүү жана сапатты катуу көзөмөлдөө боюнча талаптарды койгон.
Андан соң ал терминал имаратынын курулушу менен таанышты. Жалпы аянты 10 миң чарчы метр болгон эки кабаттуу терминал саатына 350 жүргүнчүнү тейлейт. Долбоор этап-этап менен ишке ашырылып, учурда экинчи баскычы жүрүп жатат.
3800 метрлик учуп-конуу тилкеси, учактарды башкарып туруучу эки жолу жана алты учак токтоочу аянтчасы бар жаңы аэропорт 4E категориясына ылайык курулуп жатат. Бул категория Boeing 737, Airbus A320/321 сыяктуу орто жана ири класстагы учактарды кабыл алууга жол ачат.
Ушул жылдын 13-майында президент Садыр Жапаров аэропорттун курулушуна капсула салган. Өлкө башчынын тапшырмасына ылайык, аэропорттун курулушу толук бойдон УКМК төрагасы Камчыбек Ташиевдин көзөмөлүндө турат.
