АКШда грин-карт лотереясы убактылуу токтотулат
АКШда жашоого жана иштөөгө укук берген грин-карт (Green card) лотереясын ойнотуу убактылуу токтотуларын Американын ички коопсуздук министри Кристи Ноэм X социалдык тармагы аркылуу билдирди.
Анын айтымында, мындай чечимге Браун университетинде ок атууга шектелген Клаудио Мануэл Невеш Валенте 2017-жылы грин-картаны дал ушул программа аркылуу алганы себеп болду.
"Президент Трамптын тапшырмасы боюнча мен АКШнын жарандык жана иммиграция кызматтары DV1 программасын дароо токтотуу боюнча көрсөтмө бердим. Бул программа мындан ары бир да америкалыкка зыян алып келбеши керек", — деди Ноэм.
Браун университетиндеги ок атуу 13-декабрда Род-Айленд штатындагы Провиденс шаарында болгон. 48 жаштагы Португалия жараны Клаудио Мануэл университеттин корпусунда эки адамды атып өлтүрүп, дагы тогуз адамды жарадар кылган. Каза болгондордун бири өзбекстандык студент болгон.
