Кыргызстан дүйнөдөгү эң ири туристтик ITB Berlin 2026 көргөзмөсүнө катышат
Кыргызстан дүйнөдөгү эң ири туристтик аянтчалардын бири болгон ITB Berlin 2026 көргөзмөсүнө катышууга даярдык көрүп жатат. Бул иш-чара Берлин шаарында өтөт.
Даярдык иштерин Туризмди өнүктүрүүнү колдоо фонду Туризм департаменти менен биргеликте жүргүзүүдө. Мунун алкагында ата мекендик туроператорлор, дестинация өкүлдөрү жана Кыргызстан туристтик уюмдар ассоциациясы катышкан иш кеңешмеси өтттү.
Жыйын учурунда улуттук стендди түзүү, ошондой эле Кыргызстандын туристтик мүмкүнчүлүгүн эл аралык деңгээлде таанытуу жолдору талкууланды.
Маалым болгондой, аталган көргөзмөдө Кыргызстандын атынан 11 туркомпания, 3 дестинация жана туристтик уюмдар ассоциациясы катышат. Улуттук стенд бирдиктүү концепцияда жасалып, өлкөнүн брендин илгерилетүүгө, B2B байланыштарды түзүүгө жана эл аралык кызматташууну кеңейтүүгө багытталат.
Фонддун өкүлдөрү белгилегендей, мындай эл аралык платформаларга катышуу - Кыргызстандын туристтик потенциалын Европада жайылтуунун жана ишкердик байланыштарды бекемдөөнүн стратегиялык куралы болуп саналат. Анткени бул көргөзмөгө жыл сайын дүйнөнүн төрт бурчунан туризм тармагынын он миңдеген адистери чогулат.
