Кыргыз сому 17-ноябрда "Учкун" басмаканасында чыга баштайт
17-ноябрдан тарта Кыргызстан ичинде 20 жана 50 номиналындагы сомдор чыгарыла баштары кечээ Президент Садыр Жапаровдун Улуттук Банктын жаңыланган имаратын көрүү убагында маалым болду.
Президенттин маалымат-катчысы Аскат Алагөзов Facebook социалдык тармагына койгон видеодо өлкө башчысы Кыргызстанда жаңы жылга чейин акчалар басылып чыгар чыкпасын тактап жатканын көрүүгө болот.
Бул ишти көзөмөлдөгөн Президенттин иш башкармалыгынын жетекчиси Каныбек Туманбаев менен Улуттук банк төрагасы Мелис Тургунбаев бардык кагаз иштери аягына чыкканын, 17-ноябрдан тарта 20 жана 50 сом акча бирдиктери басыла баштарын айтышкан. Буга улай видеодо К.Туманбаев 2026-жылы калган купюралардын бардыгы чыгарыла баштарын Президентке айтып жатат.
Белгилүү болгондой, кыргыз сомдору “Учкун” ААКсында басылат жана биринчи кезекте ишкана эскилерин алмаштырыш үчүн майда номиналдагы банкнотторду чыгарат.
Белгилей кетсек, буга чейин кыргыз валютасы эл аралык Oberthur Fiduciaire (Франция) жана Crane Currency (АКШ) басмаканаларынын катышуусунда Европа өлкөлөрүндө чыгарылып келген.
