Ислам каржылоо принциптерин өнүктүрүүчү мыйзам долбоору экинчи окууда кабыл алынды
Бүгүн Жогорку Кеңештин жыйынында «Кыргыз Республикасынын Граждандык кодексине өзгөртүүлөрдү киргизүү жөнүндө» мыйзам долбоору экинчи окууда кабыл алынды. Аталган долбоор Ислам банк иши жана финасылоо принциптерине байланыштуу Жарандык кодекстеги ченемдерди оптималдаштыруу максатында иштелип чыккан
Долбоордун демилгечилеринин бири, депутат Илимбек Кубанычбеков белгилегендей, мыйзам долбоорунда мурабаха келишимдеринде менчик укугун түздөн-түз кардардын атына каттоого уруксат берүү, кемүүчү мушараканы биргелешип мүлк сатып алуу формасы катары кеңейтүү жана ислам финансылык инструменттеринин тизмесин мыйзам алдындагы актылар аркылуу кеңейтүүгө мүмкүндүк берүү сунушталууда.
Талкуу учурунда депутаттар ислам каржылоосунун өзгөчөлүктөрүн жарандарга түшүндүрүү зарылдыгын белгилешип, айрым терминдерди мамлекеттик тилде колдонуу сунушун да көтөрүштү. Ошондой эле мыйзам долбоорунда келишимдердин шарттары так көрсөтүлүшү керектиги айтылды.
