Электр энергиясын импорттоону кескин кыскартуубуз керек - президент
Президент Садыр Жапаровдун төрагалыгы алдында кечээ, 28-декабрда, өлкөнүн министрлер кабинетинин жыйынтыктоочу жыйыны өттү.
Жыйында кириш сөз сүйлөгөн президент гидро потенциалга ээ болуп турганда, электр энергиясын импорттоону кескин түрдө кыскартуу керектигин билдирди.
“Жараткан тартуулаган суу ресурстарын туура пайдаланып, электр кубатын өндүрүүнү жогорулатып, элибизди арзан электроэнергиясы менен камсыз кылууга милдеттүүбүз. Кыргыз энергетикасынын келечектеги флагманы болгон “Камбар-Ата-1″ ГЭСинин курулуш иштеринин башталышы — өлкөнүн энергетикалык көз карандысыздыгын камсыздоого жол ачат. Кийинки жылдары экспорттук тизмеге электр энергиясын дагы кошууга жетишүүбүз керек”, – деди ал.
Эскерте кетсек, Улуттук энергохолдингдин башчысы быйыл Түркмөнстандан 1.3 млрд киловатт-саат электр энергиясын импорттоо боюнча мурда келишимдерге кол коюлганын билдирген. Бирок Өзбекстан өз муктаждыгы үчүн Кыргызстан Түркмөнстандан сатып алган электр энергиясын иштетип жиберген.
Акыркы маалыматтар боюнча Өзбекстандын Энергетика министрлиги Түркмөнстандан сатып алынган, бирок ортодон колдонуп жиберген Кыргызстанга таандык электр энергиясын 2023-жылы кайтарып берүү боюнча келишимди жарыялаган.
