Б.Төрөбаев “Борбор Азия – Европа Биримдиги” экономикалык форумуна катышты
Суу ресурстары, айыл чарба жана кайра иштетүү өнөр жайы министри Бакыт Төрөбаев Өзбекстандын Ташкент шаарында өткөн “Борбор Азия – Европа Биримдиги” үчүнчү экономикалык форумуна катышты. Бул тууралуу өкмөттүн басма сөз кызматынан билдирди.
Форумда сүйлөгөн сөзүндө Бакыт Төрөбаев аймактар аралык кызматташтыкты өнүктүрүү жана өз ара байланыштарды тереңдетүү маанилүү экенин белгилеп, экономика, жашыл энергетика, транспорт жана маанилүү кен байлыктары сыяктуу бир катар багыттарда биргелешкен иштерди улантуунун зарылдыгын баса белгиледи.
Иш-чаранын алкагында вице-премьер-министр Европа Биримдигинин эл аралык өнөктөштүк боюнча комиссары Йозеф Сикела менен жолугушту. Тараптар Кыргыз Республикасы менен Европа Биримдигинин ортосундагы учурдагы кызматташуунун жүрүшүн талкуулашты.
Бакыт Төрөбаев ЕБ жана анын институттары Кыргызстанда маанилүү долбоорлорду ишке ашырууда көрсөтүп жаткан колдоону жогору баалап, мындан аркы өз ара кызматташтыкты кеңейтүүгө даяр экенин билдирди.
