Кыргызстан БУУдагы тынчтык диалогунун демилгечиси болду
Кыргызстандын демилгеси менен 2025-жылдын 15-декабрында Нью-Йорк шаарында Германиянын төрагалыгы астында БУУнун Тынчтыкты куруу комиссиясынын жыйыны болуп өттү.
Бул тууралуу ТИМ басма сөз кызматынан кабарлашты. Билдирүүгө караганда, жыйында Кыргызстан, Тажикстан жана Өзбекстандын чек ара маселелерин эл аралык укуктун алкагында, тынчтык жолу менен жөнгө салуудагы жетишкендиктери жогору бааланды.
КРнын Тышкы иштер министринин биринчи орун басары Асеин Исаев өз сөзүндө, Борбордук Азия аймагы эң татаал жана тарыхый шартталган маселеде да өз ара ишеним жана саясий эрк аркылуу ийгиликтүү чечим чыгара аларын далилдей алды, деп белгиледи.
Комиссиянын жыйынына БУУнун 80ден ашуун мүчө мамлекети катышып, жетишилген макулдашууларды мамлекет башчыларынын саясий эркинин жана дипломатиялык жетилгендиктин үлгүсү катары белгилешти.
