Чүйдө 4,5 млн куб метрдик жаңы декадалык бассейндин курулушу башталды
Министрлер Кабинетинин Төрагасы Адылбек Касымалиев Чүй облусунун Москва районундагы Ак-Суу дарыясында декадалык жөнгө салуучу жаңы бассейндин курулушуна капсула салуу аземине катышты. Бул тууралуу Өкмөттүн басма сөз кызматынан билдиришти.
Адылбек Касымалиев өлкөнүн ирригация тармагын өнүктүрүү – өлкө үчүн артыкчылыктуу багыт экенин белгилеп, жыл сайын республикалык бюджеттен 1 млрд сомдон 3 млрд сомго чейин каражат бөлүнүп жатканын айтты. Мурда бул сумма республика боюнча 200 млн сомдон ашпаган.
“Калкты сугат суу менен камсыз кылуу максатында республика боюнча 44 ирригациялык объектти куруу пландалган. Бүгүнкү күндө 10 объект толугу менен реконструкцияланып, пайдаланууга берилди. Натыйжада 5 680 гектар жаңы сугат жерлер өздөштүрүлдү, 37 953 гектар сугат жеринин суу менен камсыз болуу деңгээли жакшыртылды, ал эми 12 253 гектар жердин мелиоративдик абалы оңдолду,” – деди ал.
2024–2030-жылдары жалпы сыйымдуулугу 953,74 млн куб метрди түзгөн 106 декадалык жана суткалык бассейнди куруу пландалууда. Алардын ичинен Чүй облусунда 27 бассейн курулат, жалпы сыйымдуулугу 188,4 млн куб метр. Учурда Чүйдө 7 бассейн пайдаланууга берилген, 2-декадалык бассейнде курулуш жүрүп жатат, 3 долбоору иштелип жатат.
Ак-Суу дарыясындагы жаңы бассейн 4,5 млн куб метр сыйымдуулукка ээ жана ал система боюнча бардык сугат жерлерди толук кандуу суу менен камсыздайт. Натыйжада төрт айыл аймагынын 6 500 гектар сугат жеринин суу менен камсыздоо деңгээли жогорулайт. Бул долбоор аймактагы айыл чарбасынын өнүгүшүнө жана социалдык-экономикалык сектордун өсүшүнө өбөлгө түзөт.
Учурда республика боюнча 2 700 км канал жана 4 263 гидротехникалык курулма калыбына келтирилип, 142 насостук агрегат оңдолду жана алмаштырылды. Ирригациялык тармак үчүн 301 даана атайын техника жана кызматтык автотранспорт алынган.
