Зумерлер 2030-жылы жумушчулардын 50%ын түзөт
Эмгек рыногунда иш берүүчүлөрдүн үстөмдүк ролу азайып, талапкерлер барган сайын иш шарттарын жана компанияларды өздөрү тандай баштаганын бизнес-чарада рекрутинг агенттигинин директору Алина Макенова билдирди.
Анын айтымында, негизги тренддердин бири — иш берүүчү менен кызматкердин ортосундагы күчтөрдүн тең салмактуулугунун өзгөрүшү.
"Бүгүнкү күндө кызматкерди иш берүүчү гана тандабастан, талапкер да компанияны тандайт. Ошондуктан компаниялар өздөрүн продукт катары көрсөтө баштады — иш берүүчү брендин өнүктүрүп, күчтүү адистер үчүн атаандашууда", — деди ал.
Макенованын айтымында, эмгек рыногуна Z муун чоң таасир этүүдө. Учурда жумушчулардын болжол менен 30%ын зумерлер түзсө, 2030-жылга карата алардын үлүшү 58%дан ашышы мүмкүн.
Ушуга байланыштуу компаниялар кызматкерлердин жаңы талаптарына ылайыкташууга тийиш.
Бул өзгөрүүлөрдүн бир көрүнүшү — "джобхопинг" (жумушту тез-тез алмаштыруу). Мурда кызматкерлер бир компанияда орточо 3–5 жыл иштешсе, азыр, айрыкча креативдүү тармактарда, бул мөөнөт 3–6 айга чейин кыскарды.
"Кызматкерлер жумуштан кетүүдөн коркпой калышты жана жаңы мүмкүнчүлүктөрдү издөөгө даяр. Алар тез эле өздөрүн өсүп кеттим деп эсептеп, кийинки баскычка өтүп кетишет", — деп түшүндүрдү ал.
Ошондой эле ал айлык акылардын деңгээли теңелип жаткан шартта компаниялар кызматкерлерди кармап калуунун жаңы ыкмаларын издөөгө мажбур болуп жатканын белгиледи. Мындай ыкмалардын бири — "эмоционалдык айлык".
Макенованын айтымында, талапкерлер эми айлыкка гана эмес, коллективдеги атмосферага, башкаруу стилине, карьералык өсүү мүмкүнчүлүктөрүнө жана ал тургай кеңсенин көрүнүшүнө да көңүл бурушат.
"Көптөр үчүн жумуш орду ыңгайлуу жана заманбап болушу маанилүү — аны социалдык тармактарда көрсөтүүгө да ылайыктуу болушу керек", — деди ал.
Эксперт ошондой эле технологиялар ыкчам өнүгүп жаткан шартта тажрыйбага караганда үйрөнө билүү жөндөмү маанилүүрөөк болуп жатканын, ошондой эле техникалык адистер үчүн да soft skills мааниси өсүп жатканын кошумчалады.
Анын айтымында, дагы бир маанилүү тренд — гиг-экономиканын өнүгүшү, башкача айтканда долбоордук негизде иштөө.
"Бардык эле кызматкерлер туруктуу график менен иштөөнү каалашпайт. Көпчүлүгү долбоордук ишти тандап, убактысын жана кирешесин ийкемдүү башкарууну артык көрүшөт", — деп жыйынтыктады ал.
