С.Жапаров: Ийгиликтүү экзамен тапшырган курсанттар 18%га кыскарды
Президент Садыр Жапаров Транспорт каражаттарын жана айдоочулук курамды каттоо боюнча мамлекеттик "Унаа" борборуна барып, жеке автоунаа мектептеринин директорлору жана курсанттары менен жолугушту.
Президенттин басма сөз кызматы билдиргендей, Садыр Жапаров жол кыймылынын эрежелерин бузууга байланыштуу жол-транспорт кырсыктарын кыскартуу боюнча көрүлүп жаткан чаралар тууралуу кеңири түшүндүрмө берди.
Мамлекет башчысы узак убакыт бою айдоочуларды даярдоо системасында коррупциялык көрүнүштөр орун алып келгенин белгиледи. Анын айтымында, буга байланыштуу мурда жеке автоунаа мектептеринде экзаменден ийгиликтүү өткөндөрдүн үлүшү 90%дан ашып келген. Ошол эле учурда айдоочулардын көпчүлүгүнүн чыныгы билими белгиленген талаптарга жооп берген эмес.
Ал коррупцияга каршы системалуу күрөш башталып, көзөмөл күчөтүлүп, тиешелүү органдарда кадрдык өзгөрүүлөр жүргүзүлгөндөн кийин абал кескин өзгөргөнүн белгиледи. Ачык-айкын жана катуу экзамендик тартип шартында ийгиликтүү тапшыргандардын саны 18–20%га чейин кыскарып, бул айдоочулукка талапкерлердин чыныгы даярдык деңгээлин объективдүү чагылдырганын айтты.
Президент мындан ары тартипти бекемдөө, адам факторун толук жоюу жана экзамен системасын ирээтке келтирүү аркылуу айдоочулук күбөлүктү мыйзамсыз алуу мүмкүнчүлүгү толугу менен жоюларын, ал эми экзамен тапшыруу процесси адилеттүү жана калыс болорун баса белгиледи.
Ошондой эле Садыр Жапаров акыркы он жыл ичинде республика боюнча болжол менен 75 миң жол-транспорт кырсыгы катталып, анын кесепетинен 9 миң 120 адам каза болгонун кошумчалады.
