Улуттук илимдер академиясынын ишин жөнгө салган токтом кабыл алынды
Министрлер Кабинети Кыргыз Республикасынын Президентине караштуу Улуттук илимдер академиясынын (УИА) ишмердүүлүгүнө байланыштуу токтом кабыл алды. Бул тууралуу Өкмөттүн басма сөз кызматынан билдиришти.
Аталган токтом менен Улуттук илимдер академиясынын уставы, илим жана инновациялык технологиялар чөйрөсүндө фундаменталдык жана колдонмо изилдөөлөрдү координациялоо боюнча кеңеш жөнүндө жобо, ошондой эле УИАнын мүчөлөрүн шайлоо тартиби тууралуу жобо бекитилди.
Токтомго ылайык, УИАнын укуктук макамы такталып, илимий экспертизанын ролу күчөтүлдү. Мындан тышкары, Улуттук илимдер академиясына Кыргыз Республикасынын Президенти үчүн илим жаатындагы ар жылдык улуттук отчётту, ал эми Министрлер Кабинети үчүн отчеттук мезгилдеги илимий жетишкендиктер камтылган жылдык отчётту даярдоо милдети жүктөлдү.
Ошондой эле УИАнын мүчөлөрүн шайлоо тартиби жөнгө салынып, квалификациялык талаптар, жаш курактык чектөөлөр жана академиялык жоопкерчилик белгиленди. Документте кызматкерлердин этика кодекси, илимий жана административдик ишмердикти жүргүзүүдө кызыкчылыктардын кагылышына жол бербөө маселелери да камтылган.
