Адылбек Касымалиев Өзгөндөгү жаңы мектептин ачылышына катышты
Министрлер Кабинетинин Төрагасы Адылбек Касымалиев Ош облусуна болгон иш сапарынын алкагында Өзгөн районунун Төрт-Көл айыл аймагына караштуу Жылалды айылындагы орто мектептин жаңы имаратынын ачылышына катышты. Бул тууралуу Өкмөттүн басма сөз кызматынан билдиришти.
Жаңы мектеп республикалык бюджеттен 152 млн сом каражат бөлүнүп курулуп, 275 орунга ылайыкталган. Имарат заманбап окуу класстары, китепкана, ашкана, канализация, ысык жана муздак суу менен камсыз болуп, бардык шарттары бар билим берүү жайы катары пайдаланууга берилди.
Адылбек Касымалиев эски мектеп имараты айылга 50 жыл кызмат кылганын белгилеп, жаңы объект окуучулар үчүн сапаттуу билим алууга ыңгайлуу шарт түзөрүн айтты. Анын айтымында, билим берүү тармагын өнүктүрүү мамлекеттик саясаттын артыкчылыктуу багыттарынын бири болуп саналат.
Ошондой эле МинКаб башчысы 2025-жылы Ош облусунда 16 жаңы мектеп ишке берилгенин, ал эми апрель айынан тарта мугалимдердин айлык маянасы көбөйөрүн маалымдап, бул чаралар билим сапатын жогорулатууга багытталганын белгиледи.
