Жогорку Кеңештин ишин эми ЖИ алып баруучулар чагылдырат

Жогорку Кеңеште парламенттин ишин чагылдыруу жана анын ишмердүүлүгү тууралуу маалыматты ыкчам жеткирүү максатында жасалма интеллектке негизделген система ишке киргизилди. Бул тууралуу Жогорку Кеңештин басма сөз кызматынан билдиришти.

Жаңы долбоордун алкагында "Мырза" жана "Айым" аттуу виртуалдык телеалып баруучулар каралып жаткан мыйзам долбоорлору жана башка маселелер боюнча видеоматериалдарды жана маалыматтык тексттерди даярдап, депутаттардын иши тууралуу коомчулукка маалымат таратышат.

Бул демилге Жогорку Кеңештин Төрагасы Марлен Маматалиевдин парламенттин ишмердүүлүгүн санариптештирүү жана заманбап технологияларды кеңири колдонуу боюнча берген тапшырмасынын негизинде ишке ашырылды. Аталган багытта Аппаратка тиешелүү тапшырмалар берилип, кыска мөөнөт ичинде бир катар долбоорлор иштелип чыккан.

"Мырза" жана "Айым" — санариптик трансформациянын алкагында ишке ашкан долбоорлордун бири болуп саналат.