Былтыр жаратылышты коргоо багытында 3,6 млн сом айып пул өндүрүлгөн
2025-жылы өсүмдүктөр жана жаныбарлар дүйнөсүн коргоо багытында жалпысынан 42 текшерүү жана 561 рейддик иш-чара жүргүзүлдү. Анын жыйынтыгында 567 укук бузуу фактысы аныкталып, 3 907 500 сом айып салынды. Учурда анын 3 594 500 сому өндүрүлдү. Бул тууралуу Жаратылыш ресурстары, экология жана техникалык көзөмөл министрлигинен билдиришти.
Ысык-Көл жана Соң-Көлдө рейддик иш-чаралар
Ысык-Көл акваториясында 99 рейд өткөрүлүп, 63 айып салынды (жалпы суммасы 335 500 сом). Ошондой эле 3 038 162 сом өлчөмүндө доо коюлуп, анын 2 371 893 сому өндүрүлдү. Рейддердин жүрүшүндө 30 600 метр синтетикалык балык торлору жок кылынды.
Соң-Көл акваториясында 100 рейд жүргүзүлүп, 98 мыйзам бузуу катталды. 308 000 сом айып салынып, 3 800 метр мыйзамсыз орнотулган балык торлору алынган.
Жалпысынан республика боюнча 56 900 метр синтетикалык балык торлору алынып, мыйзамсыз пайдаланууга бөгөт коюлду.
Мыйзамсыз аңчылык жана ташып өтүү фактылары
Манас эл аралык аэропорту аймагында мыйзамсыз атылган канаттууларды алып өтүү фактысы аныкталып, 265 500 сом өлчөмүндөгү доо толугу менен өндүрүлдү.
Мындан тышкары, Достук өткөрмө посту аркылуу мыйзамсыз ташылып жаткан 200 даана деңиз таш бакасы кармалып, Ош шаарындагы зоопаркка өткөрүлүп берилди.
Экологиялык чаралар жана мониторинг
Кыргыз Республикасынын Президентинин №131 Жарлыгына ылайык, 1267 рекреация объектиси инвентаризациядан өткөрүлдү.
Облустун аймагында 226 саркынды сууларды тазалоочу курулма иштеп жатканы аныкталса, 868 конок үйдө тазалоочу курулмалар жок экени белгилүү болду.
Тиешелүү кызмат жаратылыш ресурстарын коргоо, мыйзам бузууларды алдын алуу жана экологиялык талаптарды көзөмөлдөө боюнча иштерин мындан ары да улантат.
