Тармактык комитет венчурдук каржылоо боюнча мыйзам долбоорун 1-окууда колдоду
Инвестициялар боюнча улуттук агенттиктин башчысынын орун басары Жалын Жээналиев белгилегендей, мыйзам долбоорунун максаты стартаптарды, стартап-экосистеманы жана инновациялык технологияларды өнүктүрүү үчүн венчурдук инвестицияларды тартууга жагымдуу укуктук шарттарды түзүү болуп саналат. Бул тууралуу Жогорку Кеңештин басма сөз кызматынан билдиришти.
Мыйзам долбоорунда бир катар негизги түшүнүктөрдү мыйзамдык деңгээлде бекитүү сунушталууда. Алардын катарына "венчурдук каржылоо (инвестициялар), венчурдук инвестор, венчурдук башкаруучу, венчурдук фонд, бизнес-ангел, стартап, опциондук келишим, конверттелүүчү кредиттик келишим" сыяктуу терминдер кирет.
Талкуу маалында депутат Медербек Алиев XXI кылымда мамлекеттер инвестицияларды тартуу үчүн бири-бири менен активдүү атаандашып жатканын белгилеп, инвестициялык климатты жакшыртууга багытталган демилгелер көптөгөн өлкөлөрдө ишке ашырылып жатканын айтты. Ал мыйзам долбоорун колдоорун билдирди.
Ал эми депутат Гульнара Акимбаева коммандиттик шериктиктердин иштөө механизмдерине көңүл бурса, эл өкүлү Венера Салямова венчурдук каржылоонун артыкчылыктары жана бул каржылоо түрүнө байланышкан тобокелдиктер тууралуу маселелерди тактады.
