МинКаб Боз-Бөлтөк тоосуна бадам, жаңгак, өрүк отургузду
Кечээ МинКаб төрагасы Адылбек Касымалиев Министрлер Кабинетинин мүчөлөрү менен бирге Jashyl Dem Fest | JAZ 2026 аттуу жазгы экологиялык фестивалга катышты.
Алар экологиялык акцияга "Ала-Тоо" полигонундагы пландуу аскердик машыгуулар аяктагандан кийин толук курамы менен келишкен.
Фестивалдын иш-чарасы Чүй облусундагы Байтик айылында (Боз-Болток аймагында), флагштоктун жанындагы аймакта өттү. Касымалиев жана Министрлер Кабинетинин мүчөлөрү бадам, жаңгак жана өрүк көчөттөрүн отургузушту.
"Көчөт отургузуу — бул биринчи гана этап. Эң маанилүү жана жоопкерчиликтүү иш — аларды туруктуу жана сапаттуу кароо. Бүгүн отургузулган ар бир көчөт көңүл бурууну, өз убагында сугарууну жана камкордукту талап кылат. Ошондо гана келечекте ал толук кандуу бакка айланып, кийинки муундар үчүн татыктуу мурас болуп калат", — деди А.Касымалиев.
Бул аймак Президенттин Иш башкармалыгынын карамагында болуп, ал көчөттөрдү сугаруу жана коргоо сыяктуу бардык агротехникалык иштерди камсыздайт.
4–5-апрель күндөрү өтүп жаткан эки күндүк экологиялык марафондун алкагында жалпысынан 70 миңге жакын көчөт отургузуу пландалууда. Анын ичинен 40 миңи Чүй облусунда, дагы 30 миңи өлкөнүн башка аймактарында отургузулат.
