А. Касымалиев бюрократияны азайтуу боюнча жаңы тапшырмаларды берди
Министрлер Кабинетинин Төрагасы Адылбек Касымалиев мамлекеттик башкаруу системасын жөнөкөйлөтүү жана бюрократияны кыскартуу боюнча ведомстволор аралык комиссиянын жыйынын өткөрдү. Бул тууралуу Өкмөттүн Басма сөз кызматынан билдиришти.
Жыйында мурда кабыл алынган чаралардын аткарылышы каралып, бир катар тармактарда административдик тоскоолдуктарды азайтуу жана кызмат көрсөтүүлөрдү санариптештирүү боюнча иштер талкууланды.
Касымалиев башкаруу процесстерин санарипке өткөрүү, ченемдик жөнгө салууну жакшыртуу жана мамлекеттик кызматтарды жеңилдетүү реформанын негизги багыттары экенин белгиледи. Ал жарандар жана бизнес үчүн тоскоолдуктарды азайтуу иштерин активдештирүүнү тапшырды.
Жыйындын жыйынтыгында бир катар чечимдер кабыл алынды. Анын ичинде жер тилкелерин бөлүү процесстерин жакшыртуу, айыл чарба жаныбарларын санариптик каттоону күчөтүү, экологиялык документтерди алуу тартибин жөнөкөйлөтүү, ошондой эле туризм жана коомдук тамактануу тармагындагы кызматтарды санариптештирүү каралды.
Мындан тышкары, мамлекеттик ресурстарды натыйжалуу пайдалануу, электр энергиясын үнөмдөө жана айрым административдик процедураларды кыскартуу боюнча тапшырмалар берилди.
Белгиленгендей, бул чаралар мамлекеттик органдардын ишинин ачыктыгын жогорулатууга жана жарандар менен бизнес үчүн шарттарды жакшыртууга багытталган.
