Шайлоо учурунда дебатка катышпагандарга чара көрүү сунушталды
Жогорку Кеңештин депутаты Мирлан Жеенчороев Жогорку Кеңештин депутаттарын шайлоого талапкерлердин каржылык чыгымдарын кыскартууну сунуштады. Ал шайлоо мыйзамдарына өзгөртүү киргизүү тууралуу мыйзам долбоору боюнча сунуштарын парламенттин тиешелүү комитетине жөнөткөнүн социалдык тармактагы баракчасында билдирди.
Сунуштардын арасында шайлоо фондунун эң жогорку көлөмүн 20 миллион сомдон 10 миллион сомго чейин кыскартуу жана шайлоо күрөөсүн 300 миң сомдон 150 миң сомго чейин, башкача айтканда 50 пайызга азайтуу каралган.Мындан тышкары, бир шайлоо округунда үгүтчү бир гана талапкер менен иштей ала турган тартипти киргизүү сунушталууда.
Дагы бир жаңылык катары шайлоо алдындагы дебаттарга катышуудан баш тарткан талапкерлер үчүн жоопкерчиликке тартуу сунушу айтылды. Демилгенин автору мындай тажрыйба бир катар чет мамлекеттерде колдонуларын белгилеген.
Депутаттын пикиринде, сунушталган өзгөртүүлөр шайлоого катышкан талапкерлер үчүн тең мүмкүнчүлүктөрдү түзүп, каржылык басымды азайтып, кирешесинин деңгээлине карабастан жарандардын шайлоо өнөктүгүнө катышуусуна кеңири шарт түзөт.
