Адвокаттар боюнча арыз-даттанууларды кароодо кемчиликтер табылды
Юстиция министрлиги Адвокатура менен биргеликте №126 буйруктун алкагында Этика боюнча комиссиянын ишмердүүлүгүнө жана адвокаттарга карата колдонулуп жаткан тартип өндүрүшүнө талдоо жүргүздү. Бул тууралуу министрликтин басма сөз кызматы билдирди.
Талдоо жарандардын, мамлекеттик органдардын жана Жогорку Кеңештин депутаттарынын адвокаттардын аракеттерине байланыштуу кайрылууларынын негизинде жүргүзүлдү.
Изилдөөнүн жыйынтыгында бирдей мамиленин жоктугу, жол-жоболордун жетиштүү деңгээлде так аныкталбагандыгы, ар түрдүү колдонулушу жана кээ бир учурларда кайрылууларды формалдуу негиздер менен кароо фактылары аныкталды. Ошондой эле иш кагаздарын жүргүзүүдө жана архивдик материалдарды сактоодо кемчиликтер бар экени белгиленди.
Министрлик Адвокатуранын өз алдынча башкаруу системасында этика боюнча комиссиянын ишин сактап калуу маанилүү экенин белгилеп, анын ишмердүүлүгү ачык-айкын, бирдиктүү жана натыйжалуу болушу керектигин билдирди.
Талдоонун жыйынтыгына ылайык, Юстиция министрлиги Адвокатура менен биргеликте комиссиянын ишинин методологиясын өркүндөтүү, тартиптик жол-жоболорду тактоо жана кайрылууларды кароонун бирдиктүү механизмдерин иштеп чыгуу боюнча чараларды көрүүнү сунуштады.
Министрлик белгилегендей, аныкталган маселелер биринчи кезекте Адвокатуранын кесиптик өз алдынча башкаруу механизмдери аркылуу жөнгө салынышы керек.
Эгерде учурдагы көйгөйлөр чечилбесе, этика боюнча комиссиянын ыйгарым укуктарын министрликтин карамагына өткөрүп берүү мүмкүнчүлүгүн караган мыйзамдык өзгөртүүлөрдү демилгелөө маселеси да каралат.
Министрлик бул багыттагы биргелешкен иштер кайрылууларды кароонун сапатын жогорулатып, жарандардын жана адвокаттардын укуктарын коргоону күчөтүп, адвокатура институтуна болгон коомдук ишенимди бекемдөөгө өбөлгө түзөрүнө ишеним билдирди.
