Кыргыз-өзбек агрардык байланыштары жаңы багыттар менен толукталууда
28-июлда Кыргыз-Өзбек бизнес-форумуна даярдык көрүүнүн алкагында суу ресурстары, айыл чарба жана кайра иштетүү өнөр жайы министринин орун басары Мирбек Дүйшеев Өзбекстандын Айыл чарба министрлигинин өкүлдөрү менен жолугушту.
Министрликтин басма сөз кызматы билдиргендей, жолугушууда эки өлкөнүн агроөнөр жай комплексиндеги кызматташтыктын артыкчылыктуу багыттары талкууланды. Тараптар өсүмдүк, күрүч, картөшкө өстүрүү жана үрөнчүлүк тармактарындагы өз ара аракеттенүүнү өнүктүрүүгө көңүл бурушту.
Ошондой эле айыл чарба өсүмдүктөрүнүн сортторун сыноо, селекциялык материалдар менен алмашуу жана биргелешкен илимий изилдөөлөрдү жүргүзүү багытындагы кызматташтыктын жүрүшү каралды.
Жолугушууда Кыргызстандын селекциясында чыгарылган беде үрөнүн жана ата мекендик өндүрүштөн алынган сертификатталган үрөндүк картөшкөнү Өзбекстанга жеткирүү мүмкүнчүлүктөрү талкууланды.
Мындан тышкары, тараптар фитосанитардык коопсуздук, чек арага жакын аймактарда чегирткеге каршы биргелешкен мониторинг жүргүзүү жана айыл чарба тармагын минералдык жер семирткичтер менен камсыз кылуу маселелерин көтөрүштү.
Кыргыз тарап Өзбекстандан минералдык жер семирткичтерди узак мөөнөттүү жана үзгүлтүксүз жеткирүү боюнча келишимдин аракетин кайра жандандырууга кызыкдар экенин билдирди.
