Турак жайды милдеттүү камсыздандыруу боюнча мыйзамга айрым өзгөртүүлөр кирди
Өлкө башчысы Садыр Жапаров турак жайды өрттөн жана табигый кырсыктардан милдеттүү камсыздандыруу жаатындагы мыйзамга өзгөртүүлөрдү киргизүү тууралуу мыйзамга кол койду. Бул тууралуу президенттин расмий сайтында жарыяланды.
Маалыматка ылайык, Жогорку Кеңеш аталган мыйзамды 18-июнда кабыл алган.
Өзгөртүүлөрдүн максаты — турак жайды өрттөн жана табигый кырсыктардан милдеттүү камсыздандыруу тутумунун натыйжалуулугун жогорулатуу жана жарандарды кырсыктардын кесепеттеринен каржылык жактан коргоону күчөтүү.
Анын ичинде милдеттүү камсыздандыруу камсыздандырылуучунун эсебинен жүргүзүлөрү такталды. Ошондой эле ири жана өзгөчө ири тобокелдиктерди биргелешип камсыздандыруу үчүн камсыздандыруу пулдарын түзүү мүмкүнчүлүгү каралды.
Мындан тышкары, бул тармакка исламдык камсыздандырууга негизделген механизм киргизилет.
Ошондой эле камсыздандыруу окуяларынын тизмеси жаңыланып, камсыздандыруу пулун түзүү тартибин жөнгө салган ченемдер өзгөртүлдү.
