Кыргызстанда үч кооптуу айыл чарба каражатын сатууга тыюу салынды
Кыргызстандын аймагында үч өзгөчө кооптуу пестицидди сатууга жана жүгүртүүгө расмий түрдө тыюу салынды. Тиешелүү чечим Суу ресурстары, айыл чарба жана кайра иштетүү өнөр жайы министринин тапшырмасынын негизинде кабыл алынды.
Министрликтин басма сөз кызматынын маалыматына ылайык, Өсүмдүктөрдү химиялаштыруу, коргоо жана карантин департаменти алгач пестициддерди жеткирүүчүлөр менен жумушчу жолугушуу өткөрүп, аталган каражаттардын курамын, коопсуздугун жана эл аралык талаптарга шайкештигин талкуулады.
Андан соң өлкөнүн бардык аймактарындагы пестициддерди жана минералдык жер семирткичтерди саткан соода түйүндөрүндө мониторинг жүргүзүлүп, жүгүртүүдөгү каражаттарга талдоо жасалган.
Анын жыйынтыгында Кыргызстандын аймагында өзгөчө кооптуу пестициддерди жүгүртүүгө тыюу салуу тууралуу №111 буйрук кабыл алынды.
Тыюу салынган активдүү заттардын тизмесине бета-цифлутрин, бромоксинил октаноат жана фенамифос кирди.
Министрликтин маалыматына караганда, бул чечим жарандардын ден соолугун коргоого, айлана-чөйрөгө тийгизилүүчү зыянды азайтууга, айыл чарба өндүрүшүнүн коопсуздугун жогорулатууга жана эл аралык экологиялык милдеттенмелди аткарууга багытталган.
Тактап кетсек, пестицид — бул айыл чарбасында өсүмдүктөрдү зыянкечтерден, отоо чөптөрдөн жана ар кандай оорулардан коргоо үчүн колдонулуучу химиялык же биологиялык каражат.
