Камбар-Ата-1 ГЭСи боюнча үчүнчү раунддук сүйлөшүүлөр Алматыда өттү
Алматы шаарында Кыргызстан, Казакстан жана Өзбекстан ортосунда Камбар-Ата-1 ГЭСин биргелешип куруу боюнча өкмөттөр аралык макулдашуунун долбооруна арналган үч тараптуу сүйлөшүүлөрдүн 3-раунду өттү. Бул тууралуу Энергетика министрлиги билдирди.
Маалыматка ылайык, сүйлөшүүлөргө үч өлкөнүн ТИМ, энергетика, каржы, суу ресурстары тармагынын өкүлдөрү катышты. Кыргызстандан делегацияны энергетика министринин орун басары Салават Садыракунов, Казакстандан биринчи вице-министр Нурлан Алдамжаров, Өзбекстандан министрдин биринчи орун басары Умид Мамадаминов жетектеди. Дүйнөлүк банк байкоочу катары катышты.
Тараптар макулдашуунун долбоорун, биргелешип башкаруу механизмдерин, каржылоо ыкмаларын талкуулады.
Эске салсак, 1-раунд Бишкекте 31-март – 2-апрелде, 2-раунд Ташкентте 28-30-апрелде өткөн.
Камбар-Ата-1 ГЭСинин кубаттуулугу 1 860 МВт, жылдык өндүрүшү болжол менен 6 млрд кВт/саат болот.
