ОКӨФ чакан жана орто бизнести колдогон жаңы программасын иштеп чыкты - 20 миң доллардан 1 млн долларга чейинки долбоорлорду каржылайт
Орус-кыргыз өнүктүрүү фонду (ОКӨФ) чакан жана орто бизнести колдоо боюнча жаңы программа кабыл алды. Анын шарттары тууралуу фонддун башкармалыгынын төрагасы Артем Новиков Фейсбук баракчасында билдирди.
Анын айтымында, чакан жана орто бизнестин долбоорлорун каржылоого 600 млн сомго жакын каражат каралат. Долбоорлор ийгиликтүү ишке ашырылган учурда сумма көбөйөт.
Новиков буга чейин ишке ашпай жүргөн, инвестициялык чыгымдар үчүн жүгүртүү каражаттарын каржылоо пайда болгондугун белгиледи.
Мындан тышкары, региондордогу банк инфраструктураларын эске алуу менен, банктардын кароосу боюнча жүгүртүү каражаттарынын бир бөлүгүн накталай формада берүүгө жол берилет. Ошондой эле бөлүнгөн каржылоонун 50%га чейинки бөлүгүн аймактарда долбоорлорду ишке ашыруу үчүн зарыл болгон коммерциялык жана башка кыймылсыз мүлктөрдү сатып алууга колдонууга уруксат берилет.
Күрөө жок жана жетишсиз болгон учурда ишкерлер бул көйгөйлөрдү чечүү үчүн “Кепилдик фондуна” кайрылышса болот.
Каржылоонун шарттары
Чакан жана орто бизнес программасы аймактардагы коммерциялык банктар аркылуу 20 миң доллардан 1 млн долларга чейинки долбоорлорду каржылайт. Фонд 14 банк менен иш алып барат.
Пайыздык чендер:
- АКШ доллары менен: инвестициялык долбоорлор үчүн 5 жылдык мөөнөткө 5%, акча жүгүртүүгө – 3 жылдык мөөнөткө 9%
- сом менен: инвестициялык долбоорлор үчүн 3 жылдык мөөнөткө 8%, акча жүгүртүүгө – 3 жылга 14%.
Фонд ата мекендик ишкерлерди колдоого багытталган. Ошондуктан фонддон берилген улуттук валютадагы каражаттарга долбоорго чийки заттарды, товарларды, кызматтарды КРдагы ата мекендик ишкерлерден, өндүрүшчүлөрдөн гана сатып алууга уруксат берет.
ОКӨФтүн жетекчиси бардык жарыяланган шарттар иштеп жатканын кошумчалады. Насыяларды сентябрдан баштап алса болот.
