Өлкөдө 186 МТС иштеп, 4 миңге жакын айыл чарба техникасы кызмат көрсөтүүдө
Кыргызстан боюнча машина-трактордук станциялардын (МТС) карамагында 4 миңге жакын айыл чарба техникасы бар. Республика боюнча жалпы 186 МТС түзүлгөн: алардын 63ү муниципалдык, 123ү жеке менчик болуп саналат. Бул тууралуу Айыл чарба министрлигинен билдиришти.
Министрлик белгилегендей, МТСтер Суу ресурстары, айыл чарба жана кайра иштетүү өнөр жайы министрлигинин демилгеси жана Өкмөттүн колдоосу менен түзүлгөн.
Бул демилге айылдык товар өндүрүүчүлөрдү өз маалында сапаттуу механизациялык кызматтар менен камсыз кылууга, лизингди өнүктүрүүгө, техника паркты модернизациялоого жана жаңылоого багытталган.
МТСтерди уюштуруу 2016-жылдын 17-мартындагы №107-б буйруктун негизинде башталган.
Аймактар боюнча МТСтердин саны мындайча бөлүштүрүлгөн: Нарын облусунда 30, Ысык-Көлдө 33, Ошто 19, Баткенде 12, Чүйдө 39, Таласта 25 жана Жалал-Абад облусунда 27 МТС иштеп жатат.
Бул станциялардын иши айыл чарба техникаларына жеткиликтүүлүктү жогорулатып, агрардык сектордун натыйжалуулугун арттырууга багытталган.
