«Соода Болсун», «Анан-Банан» — Lucky Socks бренди Казакстандын рыногуна кирди
Байпак чыгарган Socks Master компаниясы Казакстанга продукциясын экспорттой баштады. Өндүрүштү кеңейтүүгө АКШнын Эл аралык өнүгүү агенттигинин (USAID) 50 миң доллар өлчөмүндөгү гранты көмөк көрсөткөн. Бул тууралуу ишкананын пресс-турунда белгилүү болду.
USAIDдин колдоосу менен Socks Master компаниясы заманбап жабдууларды алып, Кыргызстанда биринчилерден болуп термо- жана спорттук байпак өндүрүшүн ишке киргизди.
Ишкана өндүрүштү кеңейтип, 40 адамды жумуш менен камсыз кылган. Жакынкы арада дагы 15 адамды жумушка алууну пландап жатышат. USAID менен өнөктөштүктүн аркасында Кыргызстандын жарандары үчүн 61 жумуш орундары түзүлмөкчү. Белгилей кетчү нерсе, алардын айрымдары Россиядагы мурдагы эмгек мигранттары болуп саналат.
2020-жылы компания Lucky Socks бренди менен түстүү байпактарды чыгара баштаган. Бренддин дизайнерлери белгилегендей, идея катары кыргыз маданиятынын элементтери, жаштар арасында популярдуу сөздөр алынган. 2022-жылы компания Казакстанга байпак линиясын экспорттой баштаган.
Socks Master — бул социалдык багыттагы компания. Алар жакынкы айылдардан келген аялдарды жана мүмкүнчүлүгү чектелген адамдарды жумушка алышат.
Socks Master компаниясы үчүн жабдуулар USAIDдин атаандаштыкка жөндөмдүү ишкананын беш жылдык долбоорунун алкагында берилди. Долбоор Кыргызстанда жаңы жумуш орундарын түзүү үчүн ишканаларга өндүрүштү кеңейтүүгө жана сатууну көбөйтүүгө жардам берет. 2018-жылдан бери USAID бул долбоор аркылуу өлкө боюнча 120дан ашык бизнеске колдоо көрсөткөн. Алардын арасында жеңил өнөр жай, тамак-аш өндүрүшү, айыл чарба, маалымат технологиялары, каржы жана башка тармактардагы чакан жана орто ишканалар бар.
