Уставдык капиталы 100 млн доллар болгон БАЭ менен биргелешкен холдингдик компания түзүүгө кол коюлду
Президент Садыр Жапаров менен Бириккен Араб Эмираттарынын (БАЭ) президенти шейх Мухаммед бин Заед Аль Нахайяндын сүйлөшүүлөрүнүн жыйынтыгында, Кыргызстанда Биргелешкен холдингдик компания түзүү жөнүндө эки тараптуу макулдашууга кол коюлду. Бул тууралуу өлкө башчынын маалымат кызматы билдирди.
Абу-Даби Өнүктүрүү фонду менен 1 млрд 200 млн долларына чейинки ар кандай коммерциялык өнүктүрүү долбоорлорун ишке ашырууга багытталган уставдык капиталы 100 млн доллар болгон Биргелешкен холдингдик компания уюштуруу боюнча өнөктөштүк мамиле жана расмий келишимдер түзүлдү.
“Каражат транспорттук-логистикалык хабдар, IT-инновациялары, энергетика тармактары жана азык-түлүк коопсуздугу боюнча ири долбоорлорду ишке ашырууга, жаңы форматтагы биргелешкен эс алуу аймактарын жана жаңы шаарларды түзүүгө, ошондой эле башка өнүктүрүү долбоорлоруна жумшалары күтүлүүдө”, – деп айтылат маалыматта.
Эскерте кетсек, 24-октябрда Жогорку Кеңештин Бюджет, экономикалык жана фискалдык саясат боюнча комитетинин жыйынында Экономика жана коммерция министри Данияр Амангельдиев аталган фондду түзүү боюнча макулдашуунун долбоорун жактыруу үчүн аны комитеттин кароосуна алып келген.
Жыйында депутаттар түрдүү суроолорду берип, министр менен кызуу талкууга алышкан. Комитеттин мүчөлөрү бул каражат кайрадан эле “белгилүү эле адамдарга” берилип, катардагы жарандар алууга мүмкүнчүлүгү болбой турганын, аталган фонддун юридикалык жактарын, айтсак, “бул фондбу же холдингпи”, “ким ээлик кылат” деген сыяктуу талкуулар болгон.
“Өнүктүрүү фонддун уставдык капиталы 100 млн доллардын тегерегинде болот. Келечекте 1 млрд долларга жете турган мүмкүнчүлүгү бар. Бул Орус-кыргыз өнүктүрүү фонду иштеген принципте иштейт, болгону акча каражаты эмираттарда болот, келген долбоорлор жактырылган күндө кредит түрүндө 4-5% менен берилет”, – деген Амангельдиев каражат социалдык долбоорлорго берилбей турганын белгилеген.
Ошондой эле Амангельдиев Финансы министри менен Улуттук банктын төрагасы БАЭге барып келишкенин, алар фонддун жетекчилиги менен жолугушуп, макулдашканын, президенттин жакынкы күндөрдөгү расмий иш сапарында бул келишимге кол коюлат деп умүттөнүп турушканын кошумчалаган эле.
“Башкармалыкта үчөө кыргыз тараптан, экөө эмираттан, ал эми фонддун кеңешинде үчөө алардан, экөө кыргыз тараптан болот. Анткени негизги акча каражаты араб фондусунан берилет”, – деген ал.
Кошумча окуңуз:
КР менен БАЭнин ортосунда капиталы 100 млн долларга жеткен инвестициялык фонд түзүлөт
