Быйыл Кумтөрдөн 11.8 тонна алтын сатылып, андан 680 млн доллар түшкөн - компаниянын отчету
2022-жылдын тогуз айында Кумтөр 11 805.37 кг (379 551 унция) алтын сатты. Бул тогуз айда алтынды сатуудан түшкөн жалпы киреше 679.8 млн долларды түздү.
Мындай маалымат кечээ, 2-ноябрда «Кумтөр Голд Компани» ЖАКтын (КГК) 2022-жылдын тогуз айынын жыйынтыгы боюнча отчетунда айтылды.
2009-жылы «Кумтөр Голд Компани», «Кыргызалтын» ААКсы жана КРнын өкмөтүнүн ортосунда түзүлгөн алтынды жана күмүштү сатуу боюнча кайра түзүлгөн келишимде каралгандай, Кумтөр кенинде өндүрүлгөн Доре куймалары Кара-Балта шаарындагы аффинаждык заводдо кайра иштетилип чыгуу үчүн «Кыргызалтын» ААК тарабынан сатылып алынат.
Аффинаждалган алтынды жана күмүштү Кыргызстанда жана анын чегинен тышкары сатууга эксклюзивдүү укук «Кыргызалтын» ААКсына гана таандык.
2022-жылдын башынан бери мурда казылып алынган рудалардын запастарын кайра иштетүүнү эске алуу менен, алтын өндүрүүнүн көлөмү 2021-жылдын тогуз айында казылып алынган 292 970 унцияга салыштырмалуу 33%га өсүп, 389 357 унцияны түздү.
Компания өндүрүштүн көлөмүнүн көбөйүшү биринчи кезекте комбинатка берилген рудадагы алтындын курамынын жогору болушуна, ошондой эле рудадан металлды алуу коэффициентинин жогорулашына байланыштуу болгонун айтат.
Отчетто айтылгандай, 2022-жылдын тогуз айында фабрикага ар кандай сорттогу кампалардан берилген рудадагы алтындын орточо курамы 3.40 г/т, рудадан алтынды алуу 79.2%ды түздү, ал эми ушул эле мезгилде 2021-жылы бул көрсөткүчтөр тиешелүүлүгүнө жараша 2.72 г/т жана 71.8%ды түзгөн.
